Agenda 21 Legazpin - Deskribapen orokorra

Gipuzkoako hegoaldean dago Legazpi, Urola Garaia eskualdean. Hazkunde demografiko eta urbanistiko handia ekarri zion industrializazioak Legazpiri iragan mendearen erdialdetik aurrera. Antzinako burdinolen oinordekotzat jo daiteke industrializazioa. Hazkunde eta garapen horrekin batera, ordea, bizi-kalitatea eta kultura ere bultzatu behar dira, eta zaindu egin behar da eskualdeko ondare aberatsa (antzinako industrien hondakinak eta Aizkorri mendizerra, bereziki).
Konpromiso sendoa du Legazpiko Udalak garapen iraunkorrarekin, eta hala erakusten du udal ekintza-planaren ibilbideak, hasi planifikaziotik eta gauzatze-fasera arte. Horri esker, nabarmen hobetu dira ingurumena eta bizi-kalitatea, jarduera ekonomikoen garapena galgatu gabe betiere. Bestalde, bikainak dira zeharkakotasuna eta herritarren eta udal-eragileen arteko koordinazioa. 1998ko ekainean onartu zuen Garapen Iraunkorraren aldeko Europako Hirien Gutuna, Aalborgeko Gutuna deritzona. Horrenbestez, bat egin zuen Legazpik Europako Hiri Iraunkorren Kanpainarekin.

Konpromiso hori berretsi egin zen joan den 2001eko martxoan, EAEko Iraunkortasunaren aldeko Konpromisoa izenpetu zenean. Horrela, Udaltalde 21 Pilotuan joan den 2000ko urrian Tokiko Agenda 21 ezartzeko lanean hasi ziren herrietako bat izan zen Legazpi. Lan hori 2001eko azaroan bukatu zen Legazpiko tokiko lehenengo ekintza-plana idatziz.
Ondoren, 2002ko abenduan, Udalsarea 21 iraunkortasunerako udalerrien sarea sortu zen eta Legazpi sare horretako kide da hasieratik, sarearen definizioan eta elkarren arteko jardunbide desberdinetan biziki parte hartuz.
Gaur egun, Legazpik 2008-2014 epealdirako definitu duen Tokiko hirugarren ekintza-plana kudeatzen du.