Sarrera>> Turismoa



Egutegiko Festak

Legazpiko Herri Festak - "Santikutzak"

Maiatzaren 3-an izaten dira jai nagusiak. Legazpiko herri festek Mirandaolako gertaera dute iturburutzat. Herrikoiak, kultur eta kirol elkarteek, udalarekin bat, antolatzen dituzte, apirilaren 30 arratsaldean hasi eta maiatzaren 1, 2,3 eta 4an(Santikutz Txiki eguna azken hau) burutzen dira. Santikutz Txiki eguneko hurrengo igandean egiten den Mirandaola Egunak ematen die amaiera.
Irailaren 14-an berriz, Agorreko Santikutzak ospatzen dira, zehazkiago egun horretatik hurbilen geratzen den asteburuan eta 14-ko hurrengo igandean Gorostiagara igoera eta erromeria egiten dira.

Inauteriak

Azken urteotan hiru egunez ospatu izan dira Inauteri jaiak, Ostiralean ikastetxeen kalejirarekin hasi eta ondoren mozorro askeen eguna izaten da, arratsalde partean txarangaz lagundurik. Larunbatean Legazpiko Gazteak Elkarteak antolaturiko konpartsaren txanda izaten da eta Igandean berriz Euskal Herriko tradiziozko inauteri bat iristen da gure kaleetara Sustraiak Dantza taldeak sustaturik.

Oilar Jokoa

Korpus zortzigarren egunean egiten da joko hau herriko enparantzan. Garai batean arrunta zen joko hau gaur egun Legazpin bakarrik mantentzen da, eta badirudi antzar jokoaren oinarri bera duela. Jokoan begiak estalirik dituzten gazteek markaturiko bidean oilaara dagoen tokiraino iritsi behar dute, txistularien doinu jakin batez lagundurik.

San Juan

Errito bereziak egin ohi dira San Juan bezperako arratsean eta gauean. Herriko enparantzan, erdialdean, San Juan zuhaitza jartzen da: leun, labain, bilgorrez gantzaturik irristakor... Garai batean gazteek goraino igo arte elkarlehiaketan ziharduten. 1994 geroztik Armen Alardea egiten da enparantzatik abiatuta herriko kaleetan zehar, garai batean egiten zenaren antzera. Ilunabarrarekin batera San Juan sua pizten da herriko enparantzan eta txistulariak lagun, erromeria ospatzen da.

Auzoetako Jaiak

Herriko hainbat auzotan, bertako bizilagunek sustaturik, auzoetako jaiak ospatzen dituzte. Hona hemen zeintzuk diren: Ekaineko 2. asteburan Hegialde Auzoan; San Juanetan (ekainak 24) Telleriarte Auzoan; uztailaren 18-an Aztiri Auzoan; San Inaziotan (uztailak 31) San Inazio Auzoan eta San Agustinetan (abuztuak 28) Brinkola Auzoan.

Artzai Eguna

Iraileko lehen igandean egiten da Legazpin Gipuzkoako Artzai Eguna jaia. Egun guztian artisauak eta bertako produktuez ornituriko postuez gain, gazta lehiaketa, ardi lehiaketa, artzainei omenaldia, herri bazkaria, eta abar izaten dira.

San Nikolas

Abenduaren haseran ospatzen delarik, Legazpin abenduaren 5-ean, bezperan egiten da erronda. San Nikolas egunak Eguberri festen zentzua eta urtemugaren gertutasuna burura dakartza. Badirudi gaur egun Legazpin San Nikolas abestaldeak egiten duen ibilaldia bere abesti, jantzi eta ohituretan, Arrasatetik ekarria dela, "Udalaitzen sortua".

Gabonak

Abenduaren 24-an Olentzero erronden eguna izaten da, egun guztian aurki daitezke, haur, gazte zein helduak kantari. Urtarrilaren 5-ean berriz, Erregeen kabalgata egiten da.

XHTML 1.0 | CSS 2.0 | WAI 'AA ' | © Copyright 2006 Legazpiko Udala-Eskubide guztiak erreserbatuak-Euskal Herria plaza, 1 - 20230